Нашы дзеці. Мерапрыемствы, прысвечаныя Міжнароднаму дню роднай мовы, прайшлі ў Алекшыцкім дзіцячым садку.

21 лютага адзначаецца Міжнародны дзень роднай мовы. У гэты дзень людзі звяртаюць асаблівую ўвагу на беларускую мову – адзін з важнейшых сімвалаў нашай дзяржаўнасці.

Сёння ў ДУА “Алекшыцкі дзіцячы сад” прайшла акцыя “Мая прыгожая, родная мова”. Супрацоўнікі і бацькі выхаванцаў прыгадвалі самыя прыгожыя, на іх думку, словы на беларускай мове, і запісвалі іх на папяровых сэрцах. Акцыя падарыла прыемныя пачуцці ўдзельнікам, усе з задавальненнем і ўсмешкай на твары ўспаміналі найпрыгажэйшыя беларускія словы. Самымі папулярнымі сталі словы “КАХАННЕ” і “МАТУЛЯ”.

У холе наведвальнікаў установы адукацыі сустракала выстава “Мая родная мова”, якая давала магчымасць пазнаеміцца з выказваннямі беларускіх пісьменнікаў пра беларускую мову, разглядзець беларускія кнігі.

Для выхаванцаў прайшло мерапрыемства “Не пусцім мову на звод, бо беларускі мы народ”. Дзеці чыталі вершы, гулялі ў беларускія народныя гульні, адгадвалі загадкі. А таксама вадзілі карагод пад гучанне беларускіх народных песень.

Міжнародны дзень роднай мовы напамінае, што наша мова – самая прыгожая і мілагучная. Давайце ж будзем шанаць і ганарыцца сваёй роднай мовай!

Алена Белая, загадчык Алекшыцкага дзіцячага сада