Прэзентацыя кнігі Леаніда Калесніка “Ад Алекшыц да Эйсмантаў: час, прастора, лёсы”.

           29 ліпеня ў  філіяле “Алекшыцкая сельская бібліятэка” прайшла прэзентацыя кнігі Леаніда Калесніка “Ад Алекшыц да Эйсмантаў: час, прастора, лёсы”.

           На яе сабраліся чытачы нгеабыякавыя да гісторыі сваёй мясцовасці, тыя, каго цікавіць міналае жыццё продкаў…

          Бібліятэкар адкрыла мерапрыемства і адзначыла важнасць выдання кнігі земляка, гісторыка і проста цудоўнага чалавека.

          Адбылася электронная прэзентацыя самой кнігі, у якой аўтар падрабязна, гартаючы наглядны матэрыял спыняўся на самых цікавых гістарычных момантах, якія ўвайшлі ў змест кнігі. Тут жа можна было паглядзець вельмі цікавыя фотаздымкі гістарычных мясцін і знакамітых людзей нашай мясцовасці.

         Гісторыя Алекшыцкая царквы, Божая горка , верхаўлянскае свяцілішча, будынкі ХІХ стагоддзя, Жукевічскія могілкі, пагораўшчына, валуны, Алекшыцкая школа… “ Вось і турыстычны маршрут пастроены… Наша мясцовасць багата гістарычнымі падзеямі і цікавымі людзьмі, таму нам ёсць што паказаць турыстам…” – падкрэсліў у сваім выступленні аўтар.

         Затым пачаўся канструктыўны дыялог з аўтарам. З пажаданнямі добрага здароўя, новых гістарычных адкрыццяў, плённай працы выступілі: старшыня РСУП “Алекшыцы” Валерый Паўлюкевіч, дырэктар “Алекшыцкай сярэдняй школы” Валянціна Паддубіцкая, настаяцель храма пакрова Прасвятой Багародзіцы аг. Алекшыцы протаіерэй Сергій Гмір, бухгалтар РСУП “Алекшыцы” Тамара Сіцько, настаўніца беларускай мовы і літаратуры Алекшыцкай сярэдняй школы Галіна Румак, якая таксама збірае матэрыялы пра гісторыю сваёй мясцовасці і друкуе ( кніга “ Масаляны: праз смугу стагоддзяў”). Яна дапамагла матэрыяламі Леаніду Калесніку пры напісанні  яго кнігі.

         Сваю кнігу аўтар ужо падараваў на памяць многім арганізацыям: алекшыцкай сярэдняй школе, дзе ён вучыўся, філіялу “Алекшыцкая сельская бібліятэка”, дзе ён правёў шмат часу, будучы вучням і прачытаў мноства гістарычных кніг, а таксама падараваў дзве кнігі кіраўніцству РСУП “Алекшыцы”, зараз адна з іх знаходзіцца ў кабінеце намасніка старшыні па ідэялагічнай рабоце Алесі Капіцы, дзе кожны можа яе пачытаць, а другую Валерый Паўлюкевіч па - сяброўску падараваў старшыні алекшыцкага сельскага Савета Віталію Галавачу.

          Ад усіх удзячных чытачоў, якія паважаюць і цэняць сваю гісторыю, бібліятэкар уручыла аўтару на памяць каштоўны падарунак. Сродкі на яго пакупку выдзеліў старшыня РСУП “Алекшыцы” Валерый Паўлюкевіч, за што яму вялікі дзякуй!

         Шчырае ўсім дзякуй за падтрымку і ўдзел у мерапрыемстве. Усім, хто не застаўся абыякавым і адгукнуўся на запрашэнне прыняць удзел у гэтым цудоўным і вельмі патрэбным для ўсіх нас мерапрыемстве.

         Вельмі важна ведаць сваю гісторыю, паважаць сваіх продкаў, ганарыцца знакамітымі людзьмі сваёй мясцовасці, гаварыць пра гэта, каб ведалі далёка за межамі, у якой цудоўнай мясцовасці мы жывём. Калі чалавек ведае сваё мінулае – у яго ёсць будучыня.

         Бібліятэкар філіяла “Алекшыцкая сельская бібліятэка” Зоя Хлебнікава