Навагоднiя прыгоды пачалiся! Падарунак для дзяцей ад прафсаюзнай арганiзацii.

У пятніцу, 18 снежня, адбылося адкрыццё Рэзідэнцыі Бераст-Зюзі і Спадарыні Завірухі. У дзіцячы аздараўлены лагер “Бераставіцкі”, дзе размясцілася сядзіба беларускага міфалагічнага ўладара халадоў Зюзі, завіталі першыя наведвальнікі. Разам з казачнымі гаспадарамі рэзідэнцыі яны адправіліся ў чароўнае навагодняе падарожжа, у магічны свет зімовых таямніц і сакрэтаў.

“Чароўнае люстэрка, ці Неверагодныя прыгоды з Зюзяй"

–ужо сама назва анімацыйнай праграмы, якую прапануюць юным гасцям пры наведванні казачнай рэзідэнцыі, настройвае на загадкавы, інтрыгуючы лад. Сустракаючы экскурсантаў каля варот сядзібы, Спадарыня Завіруха і Маці Зямля распавядаюць ім легенду пра чароўнае люстэрка, праз якое відаць увесь навакольны свет, кожную птушачку, кожнага звера, кожнага чалавека, яго добрыя і злыя ўчынкі. Люстэрка нельга разбіць, таму што праз кароткі час свет апынецца ў вечнай цемры і загіне. І вось трэба так здарыцца, што адзін са Злыдняў разбівае люстэрка, а часткі яго надзейна хавае. Каб сустрэцца з Зюзяй, хлопчыкам і дзяўчынкам трэба адолець злых духаў і сабраць разам усе часткі люстэрка.

Гульні, конкурсы, танцы: на тэматычных пляцоўках было весела

Каб адшукаць часткі люстэрка, юным гасцям неабходна выканаць усе заданні, адгадаць усе загадкі нячысцікаў – Дамавіка, Ваструхі, Лазніка, Хлеўніка, Баламуценя, Жыжа, Гаёўкі і Балотніка, згуляць у абрадавыя гульні і павадзіць карагод з Козачкай, Катом і Палевіком. Гульні на свежай паветры з каларытнымі персанажамі падбадзёрылі хлопчыкаў і дзяўчынак. Ім сапраўды было весела правесці час на маляўнічых падворках рэзідэнцыі.

Усяго Рэзідэнцыю Бераст-Зюзі і Спадарыні Завірухі наведваюць 135 дзяцей. Гэта падарунак ад прафсаюзнай арганiзацii.